|
Sjálfsbjörg þarf að ganga í endurnýjun lífdaga |
 |
 |
|
|
Sýn félagsmanna Sjálfsbjargar birtist í nafni samtakanna. Viljinn og rétturinn til að vera sjálfbjarga, njóta jafnréttis, komast um og taka þátt í samfélaginu á öllum sviðum er það leiðarljós sem samtökin starfa eftir. Á þeirri leið hafa ýmsar hindranir verið yfirstignar, en hinar eru fleiri sem eftir er að ryðja úr vegi. Starfið heldur áfram á hverjum degi og margir leggja þar hönd á plóg með störfum sínum og stuðningi, jafnt félagsmenn, fyrirtæki, einstaklingar, stjórnmálamenn og opinberir aðilar.
“Aðgengi fyrir alla” er eitt af meginmarkmiðum Sjálfsbjargar. Með þeim orðum er átt við aðgengi að umhverfi, íbúðarhúsum, skólum, vinnustöðum, verslunum, veitingastöðum, samgöngutækjum, upplýsingatækni og búnaði og þannig má áfram telja. Þegar þú hugleiðir í stutta stund aðgengi fatlaðra á þínum daglegu slóðum þá kemstu afar líklega að því að víða er pottur brotinn. Við viljum búa til samfélag þar sem einstaklingum er ekki mismunað á grundvelli fötlunar. Það eru hagsmunir og réttur okkar allra, jafnt fatlaðra sem ófatlaðra.
Sjálfsbjörg, landssamband fatlaðra, hefur átt í álíka vandamálum og systursamtökin á Norðurlöndum hvað varðar þátttöku og virkni félagsmanna í félagsstarfinu. Samtökin á Norðurlöndum búa við álíka þjóðfélagslegt umhverfi og hafa eða eru að endurskoða starfsemi sína og stefnu. Mjög hefur dregið úr virkni einstakra aðildarfélaga Sjálfsbjargar lsf. Um leið hafa margir félagsmenn orðið ósáttari við núverandi stefnu og starfsemi samtakanna. Þeir vilja margir draga úr rekstri fasteigna, leiguíbúða o.þ.h. og leggja alla áherslu á félagsmálin sjálf, stuðning og þjónustu við félagsmenn, hagsmuna- og jafnréttismál, aðgengis- og heimaþjónustumál svo dæmi séu nefnd. Þessu til viðbótar er vaxandi rekstrarhalli til staðar, sem erfitt virðist að stöðva nema með verulegum breytingum á núverandi rekstri og eignarhaldi fasteigna Sjálfsbjargar.
Innan Sjálfsbjargar hefur stefna og tilgangur samtakanna verið mikið rædd síðustu árin bæði formlega og óformlega og sérstök framtíðarnefnd kom fram með tillögur. Gerð var skoðanakönnun árið 2000 um ímynd og afstöðu almennings og félagsmanna gagnvart Sjálfsbjörg. Ennfremur gerði vinnuhópur nemenda í MBA námi í Háskóla Íslands árið 2003 greiningarskýrslu, “Sjálfsbjörg, stefnumótun”, um stöðu samtakanna í dag og hvernig vinna mætti að nýrri stefnumótun.
Næstu skref eru áframhaldandi vinna að stefnumótuninni og að ljúka henni. Í þessu skyni hefur Sjálfsbjörg haft samband við fagmenn, sem starfað hafa að stefnumótun og rekstrarbreytingum hjá fyrirtækjum og félögum. Tilgangurinn með því er að tryggja faglega vinnu við stefnumótunina framundan og það sem er mikilvægast að verkefninu verði lokið með því að gera allar þær breytingar sem nauðsynlegar eru til þess að framkvæmd nýrrar stefnu og markmiða líti dagsins ljós. Það eru því spennandi tímar að renna upp því breytingar eru gullið tækifæri til að færa stefnu og starfsemi Sjálfsbjargar að vilja og þörfum félagsmanna í samtímanum, okkur öllum til hagsbóta.
Ragnar Gunnar Þórhallsson
formaður Sjálfsbjargar lsf
17. febrúar 2005
|
