Þann 4. júní, sem er stofndagur Sjálfsbjargar lsf,  var dregið í sumarhappdrætti landssambandsins. Dregið er tvisvar á ári í Happdrætti Sjálfsbjargar þ.e. 4. júní og svo á Alþjóðadegi fatlaðra 3.desember.

Útgefnir miðar eru 55 þúsund í hvort skipti og heildarverðmæti  204 vinninga er kr.15.600.000,-

Margir góðir vinningar voru í  boði og var fyrsti vinningur bíll að verðmæti 3 milljónir frá Bernhard ehf bílaumboðinu.

Að þessu sinni var það heppinn miðaeigandi á Akureyri , Elísa Emma Zachrison,sem hlaut stóra vinninginn.

Elísa er eiginkona Valdimars Péturssonar sem margir Sjálfsbjargarfélagar þekkja fyrir störf í þágu Sjálfsbjargar, bæði félagsins á Akureyri og eins fyrir landssambandið,  en hann hefur lengi verið skoðunarmaður ársreikninga Sjálfsbjargar.

Dóttir þeirra Lísa Z. Valdimarsdóttir tók svo við bílnum í gær og mun koma honum til foreldra sinna á Akureyri.

Stjórn Sjálfsbjargar lsf óskar vinningshafanum til hamingju með bílinn, og öðrum vinningshöfum með sína vinninga, um leið og hún þakkar öllum þátttakendum í happdrættinum fyrir stuðninginn.

Ný Framkvæmdastjórn Sjálfsbjargar lsf hélt sinn fyrsta fund á Húsavík 27. júní s.l. í húsnæði Sjálfsbjargarfélgasins að Árgötu 23.

Tilefni ferðar þangað var að heiðra Sjálfsbjörg á Húsavík og nágrenni sem átti  50 ára afmæli þann 20. júní sl.

Afmælisfagnaður var svo 27. júní á Fosshótelinu á Húsavík. Þar var boðið upp á veitingar ýmiskonar, ræður og skemmtiatriði. Núverandi formaður Húsaavíkurfélagsins, María Óskarsdóttir, fór yfir sögu félagsins og stöðu mála eins og þau blasa við í dag.

Grétar Pétur Geirsson nýr formaður samtakanna ávarpaði gesti og færið félaginu árnaðaróskir og þakkir.

Sjálfsbjörg landssamband fatlaðra og Sjálfsbjargarheimilið hafa í sameiningu ákveðið að setja á stofn Þjónustu- og þekkingarmiðstöð Sjálfsbjargar.  Yfirmarkmið miðstöðvarinnar verður að veita þjónustu sem bætir stöðu og styrkir hag hreyfihamlaðs fólks í samfélaginu, sem jafningja meðal borgaranna. Miðað er við að helstu verkefni miðstöðvarinnar geti orðið eftirfarandi:

1. Að veita hreyfihömluðu fólki svör á einum stað við sem flestum spurningum um réttindi sín.
2. Að veita hreyfihömluðu fólki stuðning og aðstoð við að leita réttar síns.
3. Að standa fyrir námskeiðum, til dæmis í formi jafningjafræðslu.
4. Að tryggja aðgang að fagfólki sem hefur sérþekkingu á málefnum hreyfihamlaðs fólks svo og að tryggja aðgang sama hóps að fjármálaráðgjöf.
5. Miðstöðin skal á sama tíma vinna að hugarfarsbreytingu í samfélaginu gagnvart hreyfihömluðu fólki með fræðslu fyrir ráðamenn og almenning.